Kumin chhunga Zoram rimawi khawvela milar thite

Kumin 2019 chhung hian Mizoramin rimawi khawvela rohlu kan neih ṭhat pathum C Lalrinmawia, May Lalbiaknungi leh T Zorampela-te kan chan.

Hranghlui zaithiam, Zoram rimawi khawvel ro neih hlutber zinga mi C Lalrinmawia chu  October 18 khan cancer natna avangin kum 64 mi niin a thi. Mizote tana sulhnu hlu tak tak hnutchhiahtu C Lalrinmawia hian hla 20 vel phuah­in, audio cassette  album pali a ti­chhuak a ni.

Hla ṭha tak tak- 'Di Chambawihpui', 'Zaleng hei zawng zingah hian' leh 'Cham rih la tlaitla engmawi' tihte min hnutchhiahtu C Lalrinmawia hi Mizote zingah a hming a dai leh tawh lo ang.

Tunlaia zaithiam lar leh rapper ni bawk, hmabak nei eng tak May Lalbiaknungi chu November 3 khan kum 25 mi niin a thi. LPS leh MZI-ten Onstage an buatsaih aṭangin mipui hriat a hlawh chho ṭan, May-i hi Septicemia vangin a boral a ni.

Hla phuah thiam leh music thiam tak T Zorampela chu December 16 khan kum 70 mi niin a thi. T Zorampela hian hla 67 vel zet a phuah a, 'poem' eng emaw zat a phuah bawk. Music zirna leh Mizo ṭawng zirna bute pawh tichhuak tawhtu, Zodi Band guitarist hi zunthlum leh thisen sang vangin a boral a ni.