Meta-in AI hmangin kum tling lo user hriat theihna tur kalpui dawn

Social media platform lian hrang hrang enkawltu, Meta chuan an platform enkawl Facebook leh Instagram a user kum 13 chin hnuailam hriat theihna turin AI thiamna hmanga an kum diktak hriat theihna an kalpui tur thu an puang. Meta chuan hmalakna thar hi facial recognition a nih loh thu blog post hmangin an tarlang nghal bawk.

Meta chuan AI hmang hian user-te chu an san zawng emaw an ruhrel inrem dan emaw hmanga endikin an kum zat an hre thei tawh dawn a, kum bithliah zat tling lo chu platform aṭangin an paih zel tawh dawn a ni. Hmalakna hi naupangten dawt hmanga account an siam ṭhin venna tura ruahman a ni a, kum tling lo nia an hriat account-te chu 'deactivate' in, an kum dik tak finfiah hma zawng hman theih a ni dawn lo a ni.

He hmalakna hi Meta-in naupangte himna tura hma an lak ṭhat tawk loh vanga court-in USD mtd 375 lai chawi tura a hrem hnua an duang a ni. Tunah hian ram ṭhenkhatah an hmang ṭan tawh a, nakin lawkah khawvel pumah hman theih tura chhawp chhuah theih an tum.