Taylor Swift-i'n AMA-ah Artist Of The Decade Award dawng dawn
November-a sem tur American Music Awards 2019-ah 'Lover' singer Taylor Swift chu Artist of the Decade Award hlan a ni dawn.
Dick Clark Productions' Executive Vice President Mark Bracco chuan hemi chungchang hi sawiin, kum 10 chhunga Taylor Swift-i'n huhang a ngah zia hi phat theih a nih loh thu leh American Music Awards-a a performance-te pawh a ropui hle ṭhin thu a sawi.
"Artist of the Decade chawimawina kan hlan tur hi kan lawm hle a ni," tia sawiin a performance chhinchhiah tlak tak mipuiten an hmuh leh hun tur a nghahhlelh thu a sawi bawk. American Music Awards 2019 hi November 24 hian Los Angeles-ah an sem dawn a, Taylor-i hi a perform nghal dawn a ni.
Alibaba's Singles' Day Gala Show-ah a perform dawn
China-in kumtina an buatsaih ṭhin, Alibaba's Singles' Day Gala Show-ah Grammy Award 10 lai dawng tawhtu Taylor Swift hi a zai dawn bawk. Asia leh China rama milar zaithiamte pawh he hunah hian an zai ang. He show-ah hian basketballer Kobe Bryant, American actor Kevin Spacey leh American-Australian actress Nicole Kidman-te pawh sawm an lo ni tawh a ni.
Shanghai Mercedes-Benz Arena-ah Taylor swift hi November 10-ah a zai dawn a, Singles' Day hi shopping holiday tiin, kumtinin China-ah hian November 11-a neih ṭhin a ni. He holiday hi nupui pasal inneihna hun atan Chinese ṭhalaite hian an hmang ṭhin bawk a ni.
Nikum khan he Singles' Day-a shopping holiday-ah hian darkar 24 chhungin dawrkaite hian $ tld 30 man hu an bungrua an hralh chhuak. Hei hi Black Friday leh Cyber Monday a an thil hralh ai pawhin a tam zawk.