My Chemical Romance-in ‘Danger Days’ deluxe edition tichhuak dawn

American rock band, My Chemical Romance chuan an album palina, 'Danger Days: The True Lives of the Fabulous Killjoys' 15th anniversary pualin deluxe edition an tichhuak dawn tih an sawi. Instagram lamah teaser pawh an tilang tawh.

Expanded reissue hi July 10-ah an tichhuak dawn a, original album remaster bakah, bonus track pakua a awm bawk ang. Bonus track-ah live performance leh Mad Gear and the Missile Kid EP-a hla pathum a tel dawn a ni. Hengte hi physical format-a la awm lo vek an ni a, a tam zawk chu streaming service-ah a vawi khatna atan an tichhuak a ni. Kum 2010, November 22-a tih chhuah 'Danger Days' hi concept alum a ni a, a storyline hi rebel band, 'Killjoys' ten evil corporation an beih letna chungchang a ni. Billboard 200-ah No 8 a kai a, kum 2013-a My Chemical Romance kehdarh hmaa full length album an tihchhuah hnuhnung ber a ni.