‘The Transformers: The Movie’ tichhuak thar leh dawn

Kum 1986-a tihchhuah, naupang tam tak thinlung tina a, an mi ngainat em em ‘Optimus Prime’ thihna film, 'The Transformers: The Movie' chu a kum 40 tlin lawmna pualin cinema-ah tihchhuah nawn leh a ni dawn ta. He film hi a chhuah tirh khan sum lak luh kawngah hlawhchham hle mah se, kum a vei deuh hnuah entu leh ngainatu mipui ṭhahnem tak hriat hlawh a lo ni chho ta a ni.

Hasbro leh Fathom Entertainment te chu thawk hoin, kumin September 17 leh 21 inkar hian US cinema hrang hrangah 4K technical upgrade hmangin changkang takin an chhuah leh dawn a ni. Ram dang ṭhenkhatah tihchhuah a ni ve bawk ang. He film danglam bikna pakhat chu Orson Welles, Judd Nelson, leh Leonard Nimoy te ang mi lar ṭhahnem takin aw an lo thawh tawh ṭhin a ni. Fathom CEO Ray Nutt chuan, "Kum 40 hnuah pawh he animated feature film hian ṭhangtharte thinlung a la khawih reng a ni," tiin an re-release tur chu a phur tawh thu a sawi.