Spotify leh UMG thawk dun dawn; AI hmanga hla remix siam phal dawn

Rimawi ngainatute tana thu lawmawm, Spotify chuan Universal Music Group (UMG) nen thawk dunin, rimawi ngainatute chu Generative AI thiamna hmangin UMG hnuaia artist-te hla duh ber berte sak chhawn(covers) leh remix thar siam phalna a pe dawn.

He hmanraw thar hi Spotify Premium subscriber-te chauh hman theih tur a ni dawn a, AI hmanga hla remix tharte aṭanga sum lo lut hi a hla neitu (artist) dik takte nen insem tur a ni ang. Sum lak luh inṭawm dan tur leh he hmanrua hman ṭan theih hun tur erawh an la puang rih lo.

Spotify hian hemi chungchangah music industry-a thuneitu lian dang pawh rawnin, hla phuahtute leh rimawi siamtute dikna leh chanvo (copyright) zahna lantir chunga he technology hi hman an tum thu an sawi. Phalna neisa leh hla neitute thlawpna thlapin hma hi a la a, Spotify hotu pakhat Alex Norström chuan, "He hmanrua kan siam hi zaithiamte leh hla phuahtute hlawkna leh chanvo dik tak pe chunga ruahman a ni," a ti.