Lehkhabu bawm : 'Faded Pages' leh 'Kan Thawnthu Bu Khatna' tlangzarh

Pachhunga University College, Mizo department VI semester zirlai, Tabithi Lalrinhlui lehkhabu ziak 'Faded Pages' tih chu nimin, May 26 khan Pachhunga University College Principal, Prof. H. Lalthanzara chuan a tlangzarh. He lehkhabu hi phek 50-a chhah niin English leh Mizo poetry dahkhawm a ni.

Hemi rual hian PUC Mizo department-a Post Graduate zirlaite thawnthu tawi ziak 'Kan Thawnthu Bu Khatna' tih chu Principal hian a tlangzarh nghal bawk. Hetah hian zirlai 12 te thawnthu ziak ngaihnawm tak tak a awm a, a ziaktu ṭhenkhat hi zir chhuak tawh niin ṭhenkhat hi la zir mek te an ni thung. He lehkhabu hi phek 264-a chhah niin Rs. 350 man a ni. Dr. Lalrammuana Sailo edit a ni.