One in Christ Krismas hla thar Lawmna Ropui

One in Christ chuan Krismas music video thar 'Lawmna Ropui' an tichhuak dawn. Vawiin tlai dar 5 hnu lamah hian One in Christ official You­Tube channel-ah en theihin a awm tawh dawn a, en leh ngaih­thlak a manhla leh hle ang.

'Lawmna Ropui' hi OIC khaipa ber Alvin Lalruatfela'n The Happy Goodman ho hla Unspeakable Joy a lehlin niin, video hi Hebron Pictures kutchhuak a ni a, recording hi A-16-ah an ti bawk. Music track hi Andrew Vanchhawng siam sak a ni thung.

He hla mawi tak hian Lal Isua Krista lo piang hi khawvela thilsiam tinrengte tana thu lawmawm a nih thu a tarlang a ni. OIC hian tunhnai khan hla 10 awmna music video album 'Kei kher maw Lalpa?' an tlangzarh a, he album-a an hla pakhat, YouTube-a an hla chhawpchhuah thar ber 'Phurrit a bo ta Kalvariah' tih kha tunlaia YouTube lama fakna hla thlir hlawh ber a ni mek bawk a, tuna an music video thar tur pawh hian belhchian a dawl leh hlein a rinawm.

Tunah hian member pasarih an awm mek a, Alvin Lalruatfela, Lalruatdiki Chhangte, Malsawm­tluangi Hrahsel,  Lalbiakzuali Ralte, Lalrinfeli Ralte, Christina Vanlalnghaki leh Zomuansangi Pachuau te chu member ni mekin an term hi kum khat zel a ni. Tuna member ni mekte hi nakkum January 5-ah a tawp ang.