Lehkhabu bawm : 'The War I Witnessed' tlangzarh

Dr. Smriti Das ziah ‘The War I Witnessed’ tih lehkhabu chu May 27 khân Hyve Aizawl City Hall-ah Prof. Sangkima, Mizo History Association President in a tlângzarh.

Lehkhabu ziaktu Dr. Smriti Das hi Aizawla piang leh sei lian a ni a, “Mizo ṭawng hi ka pianpui ṭawng a ni,” ti ve ngattu a ni. A pa hi kum 1920-ah Syhlet aṭanga Aizawla pêm a ni a; a nu erawh chu Aizawla piang a ni thung. He lehkhabu-ah hian rambuai ṭan tirh laia Aizawla thil thleng a hmuh leh hriat, amah ngêiin a taka a tawnte tarlan a ni.

He lehkhabu hi non-Mizo (Vai) in kan ram buaia an thil tawn an ziahna lehkhabu hmasa ber a ni hial âwm e. A ngaihnawm zâwng chauh tuipui tân pawh chhiar manhlâ tak tûr a ni. Lehkhabu dangdâi a nih avangin rambuai history zir mite tân pawh lehkhabu ṭangkai tak a ni ngêi ang.