Ruthi CVL Muanpuii 'Lalpa nang hnaih zel hi' tluk thei an la awm lo

Hontrade International Ṭhazual Faknaah Ruthi CVL Muanpuii 'Lalpa nang hnaih zel hi' bawk pakhatna a ni leh a, R. Lalruatsangi 'Chanchinṭha hril' chu pahnihna niin Grace Lalchhanhimi 'A kiangah' chu pathumna a ni ve bawk.

Ruthi CVL Muanpuii hla 'Lalpa nang hnaih zel hi' chart hmasaah pawh khan pakhatna a ni tawh a, ngaithlatute'n la duh berin pakhatna a ni nawn leh.

He hla hi David Lalliansanga phuah a ni a, tihchhuah a nih aṭanga ni tam a liam hmain Ṭhazual Chart-ah a lang nghal a, chart luahlumtu ber pawh a ni. A hla thu a ṭhain Mizo rilrem zawng tak a ni bawk nen, a zawna pakhatna dinhmun a hauh thei hi thil mak a ni lo. Eng chen nge he dinhmun hi a luahlum dawn tih hriat a chakawm hle a, a hnuaiah hian zaithiam tak tak leh an hla nalh tak takte'n a dinhmun luahlan an tum ve mek a ni.

R. Lalruatsangi 'Chanchinṭha hril' leh Grace Lalchhanhimi 'A kiangah'-te chuan an dinhmun an inthlak thleng chiah bawk. Chart hmasaah khan Grace Lalchhanhimi hi pahnihna a ni a, tun ṭumah erawh pathumnaah a awm ve thung. Chutih rualin chart hmasaa pathumna R. Lalruatsangi chu pahnihnaah a rawn inhlangkai ve thung. 

Palina, pangana leh parukna hi Krismas hla a la ni mauh mai. Tluangtea Hnamte 'Aw Krismas' chu palina a ni a, zaia rawngbawl tura sawm hlawh tak Sawmtea 'Hnam zetin tan' chu panganaah a la awm bawk. Jonathan Lalengzauva 'Bethlehem mual tlaitla engah' chu parukna a ni ve bawk a ni.