Billie Eilish naupanna ngaihnepin awm suh se Zaithiamte'n Kobe Bryant an sun

Khawvelin a ngaihsan leh a ngaihhlut, Grammy Awards chu Pathianni zan (kan ram huna Thawhṭanni zing) ah khan Staples Center, Los Angeles-ah ropui taka sem a ni a, beisei leh rinlawk ang ngeiin tleirawl Billie Eilish a ropui.

Alicia Keys chuan a zawna a kumhnihna atan Award sem inkhawm hi hnehsawh takin a kaihruai leh a, Pathianni veka thi Basketball legend Kobe Bryant thihnain Award sem inkhawm a chiah hneh hle bawk.

CBS TV chuan programme hi cover-in, performance a hmuhnawm hlawm a, a ropui zan hmangtu Billie hi perform bawkin,  Ariana Grande, Demi Lovato, Lil Nas X, Camila Cabello leh Jonas Brothers-te pawh an perform a ni. Lil Nas X perform-naah hian Mason Ramsey, Diplo leh BTS-te pawh an inlan a, boruak a nung hle.  

Demi Lovato pawh hun rei tak chhung a hriselna lam vanga a reh hnuah a rawn inlan leh a, Ariana Grande pawhin hla hrang hrang a rawn pawlh kual mawi lehpek hle bawk. Camilia Cabello chuan 'First Man' thiam takin a sa bawk a ni.

Kum 18 mi lek a ni a, zaithiam vanga chawimawina a dawn tawh zat erawh a kum let fe a ni tawh ngei ang. Pathiannia Grammy Awards semnaah pawh hian Billie Eilish bawk hi a langsar fal leh nalh a, award ngaihhlut pali a hui vek a, award panga a la thei a, record a siam a ni.

Billie hi Album of the Year, Record of the Year, Song of the Year leh Best New Artist award zan khata hui vek thei zinga naupang ber a ni a, 'When We All Fall Sleep, Where Do We Go?' hmangin Best Pop Vocal Album a dawng bawk.

Grammy 'Big Four' award zan khata hui fai vek thei pahnihna chiah a ni bawk a, a naupanna ngaihnep chi a ni lo.

Album of the Year a dawng phei chuan Billie hi a barakhaih hle a, Ariana Grande 'Thank U, Next' in a dawn a rin bakah a phu zawk a tih thu a sawi hial. A hla phuah kawnga nasa taka puitu a unaupa Finneas pawhin an album chu Grammy dawng tura an siam a nih loh thu leh, eng award mah an dawnna tur album a nih an rin loh thu a sawi.

'Big Four' award dawng thei naupang ber a nih mai piah lamah hian hmeichhe zinga award lian pali zan khata dawng vek thei hmasa ber a ni bawk.

Lizzo, Lil Nas X, Billy Ray Cyrus leh Lady GaGa-te chu award pakhat aia tam hum haw thei zingah an tel. Dance music lamah The Chemical Brothers an cheṭha a,  Gary Clark Jr. pawh cheṭha zingah a tel.

Kum 47 liam taah khan Grammy award nomination a hmu tawh a, mahse a la dawng ngai lo. Country music legend Tanya Tucker chuan Pathianni zanah khan a 

ṭumkhatna atan Grammy  a humhaw ve ta a ni,

Kum 61 lai ni tawh Tucker hian a hla 'Bring My Flowers Now' hmangin Best Country Song a dawng a, 'While I’m Livin’ hmangin Best Country Album a dawng bawk.

Grammy Award semna hmun Staples Centre, Los Angeles hi Basketball Legend Kobe Bryant team 'Los Angeles Lakers'  home court a ni a, Lakers-ah hian Bryant hi season 20 zet a khel a ni.

Kumdanga Grammy Awards sem zanah chuan pungkhawmte rilru a heheuin, hlimna zan atan an hmang ṭhin. Kuminah erawh award sem inkhawm an nguai hle ti ila kan sawisual tam awm lo e. Award sem hma lawkin Kobe Bryant leh a fanu thih thuin khawvel a deng chhuak a, chutih rual chuan khawvela zaithiamte award ngaihhlut semna inkhawm chu Bryant-a home court 

ṭhinah neih a la ni dawn zui! A phurawm dan chu a dang zar ngei ang le.

Staples Center chhunga jersey an tarlan ṭhin zawng zawng chu khuh vek niin Bryant-a jersey chiah hmuh theiha tarlan a ni. 

Grammy Awards semnaa thu leh hla nei hmasa bertu, Lizzo chuan, "Zanin hi Kobe tan a ni," tiin bul a rawn ṭan a, arena pawnah Bryant suntu mi tam tak an pungkhawm bawk.

Host Alicia Keys pawhin rilru na takin Kobe Bryant a sun thu sawi chhuakin,"A nihna takah chuan Kobe Bryant in sakah rilru kehsawmin kan ding a ni," tia a sawi hian Staples Centre leh Bryant inzawmna chu a sawichhuak chiang hle a ni. Boyz II Men-te nen Kobe pual hian 'It’s So Hard to Say Goodbye to Yesterday' an peform nghal a, mipui rilru a hneh hle a, Bebe Rexha-i'n hnuk ulh chunga a lo ngaithla lai camera-in a lo la fuh chuan mit a la hle a ni. 

2020 Grammy Awards' Premiere Ceremony-ah pawh Recording Academy's interim CEO leh board chair, Harvey Mason Jr kaihhruaina hnuaiah Bryant sunna atan hian ngawi rengin an ding bawk.

Lil Nas X pawhin a perform-naah Bryant jersey a dahlang nghe nghe. Jonas Brothers chuan  Bryant zahna lantirna turin ribbon purple an bel a, inkhawm ṭan hma red carpet hun aṭangin mi lar eng emaw zat chuan Kobe Bryant an sunna thu an sawi chhuak a ni.