Anna Kendrick-i'n 'Seven Husbands of Evelyn Hugo' direct dawn

American actress leh singer, 'Pitch Perfect' star Anna Kendrick chuan historical drama novel Taylor Jenkins Reid ziah, 'The Seven Husbands of Evelyn Hugo' film adaptation a direct dawn. He film direct tura tih filmmaker pahnih- Maggie Betts leh Leslye Headland-te chuan a chhan mumal tarlang loin project aṭang hian an in hnukdawk a ni.

Netflix chuan kum 2022 khan he project kalpuina tur right neiin, mahse film siam tur hian harsatna an tawh avangin siam a ni rih lo a ni. Film-a a changtu turte pawh puan a la ni loa, novel fan- te chuan Jessica Chastain chu Evelyn Hugo character chang turin an duh thu an lo sawi tawh a, mahse actress hian kum eng emaw zat liam ta khan a chang dawn lo tih a lo sawi tawh thung.

Reid novel ziah behchhana film siam pahnihna tur niin, kum 2023 khan Amazon chuan limited series 'Daisy Jones & the Six' tih an lo siam tawh a ni. 'The Seven Husbands of Evelyn Hugo' ah hian Reid leh Margaret Chernin-te chu executive producer an ni dawn a, Liza Chasin, Brad Mendelson-te chu producer an ni dawn a ni.