Anime hit One Piece in Samurai Blue support-na lantir

Greatest Show on Earth tih hiala sawi World Cup 2026 khelh hun tur a hnai zel a, hemi denchhen hian Japan national soccer team leh anime khawvela huhang ngah 'One Piece' manga chu thawk dunin, Japan National Football Team 'Samurai Blue' thlawpna lantir nan video thar leh 'Weekly Shonen Jump' cover photo tihchhuah a ni.

Weekly Shonen Jump Issue 26-na chuan One Piece changtu pawimawh Monkey D. Luffy chu Japan jersey pawl ha chunga football kenga a awm lai lem chu an tarlang a ni. He a inthuamna thar nena inrem tur hian Luffy-a lukhum parh (straw hat) lar tak pawh a pawl (blue) a siam a ni bawk.

Manga siamtu Eiichiro Oda hian ram tana feh chhuak tur football team-te hi lukhum pawl thar a pe bawk a; hei bakah hian fans ten khelmuala an lek tur 'cheering flags' ah ama signature a ziak tel bawk. Kumin World Cup hi June 11 - July 19 chhung USA, Canada, leh Mexico-ah te neih a ni dawn a, Japan hi Group F-ah Netherlands, Sweden, leh Tunisia-te nen an awm ho a ni.