Pokémon-in an kum 25 tlin, Katy Perry hoin an lawm dawn

Pokémon tih hming hi chu tunah chuan mitin mitangin an hre tawhin a rinawm. Kumin hi Pokémon kum 25 tlin kum a ni tawh a, hemi lawmna pual hian The Pokémon Company International chuan musical event hrang hrang an buatsaih dawn a, pop singer Katy Perry chu P25 event headliner tur a ni. He hunah hian zaithiam lar thar leh khawvel pum huapa lar award lian tak tak dawng tawhte pawh an inlan dawn tih tarlan niin, chung mite chu tute nge an nih erawh tarlan a la ni lo. Katy Perry hming hi a ri ring ber rih.

Kum 1995 khan Japanese video game designer Satoshi Tajiri chuan Pokémon hi a siam chhuakin  Pocket Monsters Red and Green game chu Game Boy-a khelh theih turin a tichhuak a, tunah chuan media franchise sum lalut tam ber zinga mi a ni tawh. Game chauh ni lo manga, anime leh movie bakah playing card thlengin Pokémon hi a lar hle a,  tunah hian anime film 23 leh live-action film pakhat siam a ni tawh bawk.

Katy Perry hi a hma pawhin video game nen inkungkaihna an lo nei tawh a, chuvang chuan Pokemon-in an thlang chat pawh hi a inhmeh hle nia ngai an tam hle. Thuchhuah a siamah Perry chuan,"Pokemon hian ka nunah hmun a chang deuh reng tawh a, a original video game Game Boy khelh aṭangin Pokemon TCG card inthleng kual te, Pokemon GO hmanga kawttlera Pokemon mante thlengin ka ti tawh a ni," tiin a sawi. Kum 25 an tlin lawmna atana sawm a nih chu chawimawina nia a ngaih thu a sawi bawk a ni.

Engang takin nge Pokemon hian kum 25 an tlin lawmna hi an buatsaih dawn tih tarlan a la ni lo a, Mizo ṭhalai tam takin an ṭhan lenpui Pokemon hian puitham takin a lawmna buatsaih an tum tih erawh a hriat theih a ni.