Pussycat Dolls-te'n management deal thar an ziak dawn, an ti!

An reh hlen dawn emaw tih tawh hnuah media hrang hrangah Pussycat Dolls-te hming hmuh tur a awm ve le ta. Management deal thar an ziak dawn, an ti. 

Nicole Scherzinger, Ashley Roberts, Kimberly Wyatt, Carmit Bachar leh Jessica Sutta-te Pop group hian Madonna leh Britney Spears'-te management company Maverick lung an dum hle nia sawi thawm a awm a, tunhnaiah Nicole hi solo-in a kal leh dawn nia sawi thawm awm mah se tuna report thar berah erawh hi chuan Dolls lam a hawi zawk dawn nia tarlang a ni. Dik tak maw!

Contactmusic-in a tarlan dan chuan hripui leng vangin Dolls-te hian hma an la chak thei lo zawk a, boruak a him velah rimawi khawvelah an zai leh lam vel kan hmu leh dawn niawm tak a ni. An thulakna in a tarlan dan chuan Nicole chuan nikum lam kha chuan solo-a kal rih a tum ngei a, hla pawh eng emaw zat a siam hman a, mahse a rilru a thlak a ni mahna; tunah chuan a ṭhiante nena thawh ho hi a thlang ta zawk a nih hmel.

Nikum lamah khan UK-ah comeback tour neih an tum tih thawm a awm hman a, mahse hripui leng vangin hei hi a puitling lo. Hetiang chanchin hriat tur a awm hnu lawk, March thlaah khan Ashley chuan Dolls chuan hma an lak theih rih loh thu leh sorkar thuchhuah an zawm a ngaih avangin October velah tour hi neih an tum zawk thu a sawi a, mahse hrileng a reh theih loh avangin anni pawh an reh zui ta a ni. Tunah erawh thawm an rawn nei leh ta a, nikum lama tour an neih tum pawh kumin May leh June thla velah hi chuan neih leh hman ngei an tum a ni.