US tour nei tura sawmna an hnar
English pop girl group lar Spice Girls chuan North America lam aṭangin sum tam tak hlawh tura sawmna duhawm tak an dawng a, mahse an hnawl niin media-te chuan an tarlang.
Spice Girls-te hian US aṭangin reunion tour nei tura sawmna hi an dawng a, tun nipui chhunga neih tura ruahman a ni. Sum pawh a tam hle a, $mtd 100 zet hlawh theihna a ni. Mahse he hun ṭha hi - Geri Halliwell, Mel C, Emma Bunton leh Mel B-te hian an tihlawhting thei dawn ta lo a ni.
Hemi chungchang hi British newspaper lar The Sun chuan an tarlang a, North America aṭang hian sum liam tham taka sawmna an dawn thu hi an tarlang a ni. Spice Girls-te hi an member Victoria Beckham tel loin an intuai thar leh mek a, UK bikah chuan vawi eng emaw zat an inlan ho leh tawh a ni.
US-a tour nei tura sawmna an hnawl chhan pawh hi an hun a chep lutuk dawn vang leh, hun a duh rei dawn avangin an hnar tih an tarlang.
Spice Girls hian May leh June thla hian UK leh Ireland-ah reunion tour an nei dawn a, show ṭum 13 zet an nei dawn a ni. Hemi atan hian ticket pawh hralh chhuah tawh niin, an inchuh zo vek tawh a ni!
Reunion tour hi May 27 ṭang hian Cardiff-ah an ṭan dawn a, Manchester, Coventry, Sunderland, Edinburgh, Bristol leh Wembley Stadium-ahte pawh show hi an nei dawn a ni.
Hetih lai hian July leh August thla velah chuan US lamah hian show nei turin an inbuatsaih ru tho niin an tarlang a, thil chiang erawh hriat tur a la awm lo thung. An member Emma chuan solo album tihchhuah a tum a, America's Got Talent lamah Mel B a inlan bawk avangin an hun awl neih a inrual lo chho nuk a ni. Hei hi tour nei tura sawmna an hnawl chhan zingah pawh a tel niin an tarlang bawk.