One In Christ-te inlak belh dawn lo

Mizo group zaithiam lar One In Christ chuan member thar an inlakbelh dawn lo a, kumin chhung chu member ngaiin an kal dawn a ni. Chutih rual chuan an member pakhat Lalruatsangi Ralte a awm tawh dawn lo thung a, a thlakna tur erawh dap an tum rih lo thung a ni. 

Ṭhazual Award 2017-a Best Group/Duo dawngtu One In Christ-te hi kum khat danah member an insiksawi ṭhin a, hei hi hun eng emaw chen chu an lo kalpui tawh a ni. Kum thar January 5 zelah term thar an ṭan ṭhin a, he hunah hi member in­thlak ngai an awm chuan an inthlak kual ṭhin a ni. 

One In Christ khaipa Al­vin Lalruatfela chuan, "Veng hrang hrangah member hi zawn ṭhin a nih avangin a hautak a, hmeichhe tan phei chuan rei tak tel a harsat chang a awm ṭhin. Kum khat dan zelah kan insiamrem mai ṭhin a, kan zai ngainatute pawhin min hriatsak se kan duh a ni," tiin a sawi. 

Tunah hian One In Christ-ah hian member paruk - Lalruatdiki Chhang­te (Soprano), Lalbiak­zuali Ralte (Tenor), Mal­sawm­tluangi Hrahsel (Contralto), Rachel Van­lal­hriatpuii (Soprano), Lalrinfeli Ralte (Soprano) leh Alvin Lalruatfela (Tenor/Bass)-te an awm mek a ni.