'MALSAWM I NI’ music video tlangzarh

Lalnunpuia Hrahsel hla phuah ‘MALSAWM I NI’ tih hla music video chu nimin khan Upa H. Lalremtluanga, Aizawl Mayor-in a office-ah a tlangzarh. He hla hi BLESS 2026 lo awm tur atana theme song tur a ni.

He hla hi Pathian malsawm kan nihna te, mihring leh mihring induhsakna malsawmna lam hawia phuah a ni a; a phuahtu Lalnunpuia Hrahselin a phuah chhan sawiin, “Pathianin a duh taka a siam, a malsawm kan ni a, malsawmna hlu ber Isua Krista kan nei a, chumi hmang chuan midang malsawm ve na atana phuah a ni” a ti. Mi fuih, chawikang thei hla a ni.

Lalnunpuia Hrahsel hlate hmang hian June 18 leh 19 zan hian BLESS 2026 hman tum a ni a, Dawrpui Multipurpose Hall ah "FAKNA INKHAWM LEH DAMNA INKHAWM" hmang tura hma lak mek a ni a, Mizo mipui a duh apiang tan chhim theih a ni ang. He hla ‘Malsawm i ni’ tih hi theme song a hman tur a ni.