Netflix chart-ah 'Teach You a Lesson' che ṭha

South Korean action school drama, 'Teach You a Lesson' chu kumin June 5-a tlangzarh a nih aṭanga ni thum hnuah Netflix global TV chart-ah No.3 ah invawrh nghalin a che ṭha hle. Hei bakah ram 25-ah No.1 niin, ram 86-ah Top 10-ah a lang pha bawk.

He drama hi Educational Rights Protection Bureau-in school hrang hranga buaina chhuahna hmuna hma an lak dan chanchin a ni a, South Korean actor Kim Moo Yul chuan Na Hwa Jin lem changin ngaihven zui a hlawh hle. He drama webtoon behchhana siam hian chi inthliarna leh inhuatna lam a lantir nia sawi a nih avangin sawiselna nasa tak a tawk a, hei vang hian Korean Teachers & Educational Workers’ Union chuan he drama hi titawp turin an ngen bawk.

South Korean actor leh film producer, Kim Nam Gil chuan a changtu ber ni tura sawmna chu a lo hnawl phah bawk a, heti chung hian series chuan mipui tam tak ngaihven a hlawh chhunzawm zel a ni. Series-ah hian Kim Moo Yul leh Lee Sung Min-te pawh a changtu ber zingah an tel.