Sony Future Filmmaker Awards 2026 sem a ni ta

Film siam thiamte chawimawina ‘Sony Future Filmmaker Awards 2026’chu Culver City, California-a Sony Pictures Studios Scenic Arts Building-ah ropui taka neih a ni ta. Kumin hi he chawimawina an sem ṭum li (4)-na a ni a, Emmy Award dawng tawh presenter Denny Directo chuan show hi a kaihhruai.

Kumin hian ram 162 aṭangin film siamtu 8,400 chuangin dilna an theh lut a, ram 20 aia tam aiawhtu film 30 chauh thlan chhuah (shortlist) niin, heng zing aṭang hian award dawng turte hi thlan chhuah leh an ni.

Category hrang hrang siam niin Fiction category-ah UK tlangval Jack Hughes chuan a film siam ‘Deadheading’ hmangin lawmman a la a, Non-Fiction (Documentary) lamah Singapore nula Christine Seow chuan ‘Two Travelling Aunties’ hmangin lawmman a dawng bawk. Animation category-ah Michelle Brøndum leh Ida Melum (Denmark/Norway) te chuan ‘Ovary-Acting’ hmangin award an dawng a, zirlai (Student) pualah Cuba nula Ana A. Alpizar chuan ‘Norheimsund’ hmangin award a dawng.

Kumin hian hmathlir thui tak nei jury member thiam tak tak — Will Gluck, Rachel O'Connor, Adam Rosette, leh an hotu ber Justin Chadwick te chuan uluk takin lawmman dawng turte hi an thlang chhuak. Award dawngtute hian tangka fai bakah Sony Digital Imaging khawl changkang ber ber an dawn bakah,Los Angeles-ah ni li (4) chhung cham theihna pek an ni. He hunah hian Hollywood-a mithiam bikte hnen aṭangin film siam dan zirtirna (workshops)—casting, CGI, sound mixing, leh talent agencies-te nena inbiak pawh dan thlengin zirtirna ṭha tak an dawng dawn a ni. He chawimawina hian khawvel hmun hrang hranga ṭhalaite thiamna pho chhuahna kawng a sial a, hma hun eng tak an neih phah a ni.