UK-in ṭhalai kum 16 hnuailam tan 'Social Media' BAN tum

United Kingdom (UK) sorkar chuan ṭhalai kum 16 hnuailamte tana social media khawih khapna dan khauh tak siam a tum thu Prime Minister Keir Starmer chuan Thawhṭanni khan a puang. He ruahmanaah hian TikTok, Instagram, YouTube, Facebook leh X te chu khap zingah hian an tel rin a ni.

Dan thar hman tur hi kum 2027 favang laia hman ṭan theih tura buatsaih a ni a, naupangte rilru hriselna vawnghim tur leh social media hrang hrang laka an fihlim theih nana he khapna hi siam a ni tih sorkar chuan a sawi. Australia sorkar hmalakna zuiin, UK sorkar hian naupang kum 16 hnuailam tana livestreaming thlir leh hmelhriat loh biak pawh thlenga khap tel a tum bawk.

UK sorkar hian thla liamta mai khan mipuite ngaihdan a la a, nu leh pa 90% zetin kum 16 hnuailam tana social media khap chu an thlawp a ni. Hetih lai hian tech company lian ṭhenkhat erawh chuan khap vekna (blanket ban) hian ṭhalaite an him lohna hmun dangah a nawr liam mai an hlauhthawn thu an sawi ve thung.