2026 World Cup Final atan BTS fan an phur ber

K-pop boy band thawm nei lian BTS chu Billboard-in ṭhalaite tana poll an buatsaihah an langsar hle. Pathianni liam ta khan Billboard chuan 2026 FIFA World Cup Final Halftime Show-a inlan tur zinga mipui nghahhlelh ber thlanna an buatsaih a, BTS chuan hma an hruai chiang hle a ni.

He poll-ah hian BTS chuan vote tla zawng zawng aṭanga 90% zet mai hmu phain, an elpui hmeichhe zaithiam lar Shakira leh Madonna-te chu an khum hneh hle. July 19-a New Jersey Stadium-a show ropui tak neih tur hi ṭhalaiten an nghakhlel hle tih a langchiang hle awm e. Kumin World Cup-ah hian kum dang ang lo takin Half-time show a awm dawn a ni.

Coldplay frontman Chris Martin chu show curator niin, BTS chuan khawvela ennawm ropui ber tihmuhnawm zual turin inbuatsaihna an kalpui mek a ni. Khawvel hmun hrang hranga an fan, ARMY zing a football en ngai lo pawhin an en phah ngei pawh a rinawm.