Grammy Awards-in Asian Pop leh Latin song category dah thar

Grammy Awards chuan category thar panga siam belhin, chung zingah chuan best Asian pop music performance leh best Latin song a tel. He category thar hi Puerto Rican superstar, Bad Bunny-a'n Spanish-language record hmanga album of the year a dawn hnuah leh, kumin kumtir lama US ceremony-a 'KPop Demon Hunters' anthem, 'Golden' a chet ṭhat hnuah siam a ni.

Grammy chief executive, Harvey Mason Jr chuan category huang zauh a ni chuan event chu mitin huap a nihna a pholang zual dawn tih sawiin, award chu music creator, artist, writer leh producer tam zawk hnenah hlan an ni thei dawn a ni, a ti. Grammy Awards buatsaihtu Recording Academy chuan nikum khan Korean leh Latino artist eng emaw zat voting panel-ah hian an lo dah tawh bawk a ni. Award category thar an puan zingah best R&B collaboration emaw duo/group performance, best traditional pop vocal performance leh best traditional folk album-te an tel. R&B performance category awmsa chu solo act lam ngaih pawimawh tura thlak a ni a, folk album awmsa chu contemporary folk-ah thlak a ni bawk.