Epiphone-in ENHYPEN member JAY signature guitar tlangzarh

K-Pop boy band lar thar leh ṭhang duang, ENHYPEN member JAY chuan khawvel huapa guitar siamtu lar 'Epiphone' nen thawk dunin, ama pual 'signature guitar' thar an tichhuak.

He guitar thar hming hi 'Jay "Raoul" SG Tribute Plus' tih a vuah a, guitar tum thiam sate tiphurtu tura duan bik a ni. Gibson SG pianhmang style lar tak anga siam niin, a rawng pawh 'Rubine Red' gloss, JAY-a thlan ngei a ni a, a hnung lamah an pahnih logo chhut kai a ni bawk.

JAY chuan guitar a la thiam lutuk loh lai pawha an fan, Engene-te phurna pekna avanga hetiang thleng thei a nih thu a sawi. He guitar hi South Korea leh Japan-ah chauh zawrh chhuah a ni rih dawn a, portrait card leh guitar tumna 'pick', a sign hnan ngei a chhawm tel dawn a ni. Epiphone hi American musical instrument brand, kum 1873-a din niin, kum 1957 khan Gibson in a lei chhawng a, Gibson hnuaiah Epiphone hi brand angin an hmang chhunzawm zel a ni.