76th Golden Globe Award: Lady Gaga leh Bradley Cooper an langsar Lawm avangin Lady Gaga insum zo lo!
Golden Globe Award vawi 76-na chu nimin zing khan Beverly Hills, California-ah sem a ni a, award dawngtu zinga langsar ber chu Lady Gaga leh Bradley Cooper-te an ni. American singer leh actor-te hian Best Original Song award an la a, lawm avangin Lady Gaga biangah mittui a luang hial.
Hetih lai hian an lawm erawh a kim lo a - Bradley Cooper nena an chan dunna 'A Star Is Born' chuan beisei a phak lo hle. Award nominee puan a nih aṭanga boruak nei lian ber ni mah se a tak ramah chuan thil a danglam a, award pakhat chauh an la a ni.
American actor Rami Malek chuan rin loh takin award a dawng thung a, drama film 'Bohemian Rhapsody' a hlawhtlinpui a ni.
Gaga a hlim
American singer Lady Gaga chuan, "Film khawvela chawimawina ngaihlut berte zinga mi kan dawng thei hi kan lawm a, a hlimawm tak zet a ni. Chawimawina ropui tak a ni a, kan thawhdunna rahchhuah liau liau a ni" a ti. Gaga chuan hlawhtlinna an chan theih nana a thawhpui American actor Bradley Cooper chu a fak hle bawk.
Best Original Song atana thlan 'Shallow' hi Bradley Cooper leh Lady Gaga-ten an sak a ni a, an channa dunna 'A Star IS Born' original sound track a ni.
Drama/Biography film Bohemian Rhapsody chu award dawng langsar a ni a, he film-a Freddie Mercury lema chang American actor Rami Malek chuan Best Actor In Film Drama award a dawn phah bawk.
Green Book chu Best Film Comedy/Musical atan thlan niin, The Wife star Glenn Close chuan Best Actress In Film Drama award a dawng. Christian Bale chu Best Actor In Film Comedy/Musical award hlan a ni a, British actress Olivia Colman kutah Best Actress In Film Comedy/Musical chawimawina hlan a ni bawk.
American thriller serial 'The Americans' chu Best TV Drama atan thlan a ni a, The Kominsky Method chu Best TV Comedy atan thlan a ni bawk. Best Actor In TV Drama award chu Bodyguard star Richard Madden chuan a dawng a, hmeichhe lamah Killing Eve chuan he chawimawina hi a dawng ve bawk.
Michael Douglas chuan award ngaihhlut tak pakhat Best Actor In TV Comedy a dawng a, The Marvellous Mrs Maisel star Rachel Brosnahan chuan Best Actress In TV Comedy award hi a humhaw ve bawk.
Sawi zui hlawh
Award ngaihlut berte zinga mi Best Motion Picture, Drama chu Bohemian Rhapsody-in a dawng a, hei hian mak tih a hlawh hle. Lady Gaga leh Bradley Cooper-te channa 'A Star Is Born' chu he chawimawina dawng tura mipui rin a ni a, mahse Bohemian Rhapsody hi thlan a ni ta zawk a ni.
Film lama mi thiamte review-ah Bohemian Rhapsody hian 48% chiah a hmu a, hetih lai hian A Star Is Born chuan 96% zet a score thung a ni. Heti chuang hian A Star Is Born hian award a la pha ta chuang lo a ni.
Glenn Close chuan Lady Gaga khumin Best Actress In Drama award a la bawk a, hei pawh hian mipui a barakhaih hle. Award dawng thei tura chawpchhuah zinga langsar ber leh, thawm nei lian ber Lady Gaga leh Cooper-ten award pakhat chauh an humhaw hian maktih a hlawh a, sawi zui pawh a tam hle a ni.
Golden Globes 2019 hi Canadian actress Sandra Oh leh American actor Andy Samberg-te chuan an host a, milar an fuankhawm hnem hle a ni. Award ceremony-ah hian rin loh takin Taylor Swift chu a inlan a, mipui lawm a hlawh hle a ni.
Golden Globes 2019 Winner
Best Original Song - Shallow, A Star Is Born
Best Film Drama - Bohemian Rhapsody
Best Film Comedy/Musical - Green Book
Best Actor In a Film Drama - Rami Malek (Bohemian Rhapsody)
Best Actress In Film Drama - Glenn Close (The Wife)
Best Actor In Film Comedy/Musical - Christian Bale (Vice)
Best Actress In Film Comedy/Musical - Olivia Colman (The Favourite)
Best TV Drama - The Americans
Best TV Comedy - The Kominsky Method
Best Actor In TV Drama - Richard Madden (Bodyguard)
Best Actress In TV Drama - Sandra Oh (Killing Eve)
Best Actor In TV Comedy - Michael Douglas (The Kominsky Method)