Hontrade International Ṭhazual Lengzem Tuma tluk loh Feli Fanai
Feli Fanai chuan a hla thar 'Tuman an tluk lo' tih hla hmangin Hontrade International Ṭhazual Lengzem chart-ah dinhmun sang ber a luah mek.
Feli Fanai hian vawi eng emaw zat No.1 a lo hauh tawh a, a hla thar nen a hmun ngai a rawn luah leh ta a ni. 'Tuman an tluk lo' tih hla hi Myztic Sailo phuah niin, nikum November thla khan tlangzarh a ni. He hla hi tunlai lengzem hla zingah chuan thlan hlawh ber a ni mek a, chart-ah pawh hun eng emaw chen chu kan hmuh zui a rinawm.
Music track hi Lal K Sailo siam niin, recording pawh a tihsak bawk. Video hi ROAR Media Production kutchhuak a ni a, hmuh a nuam hle.
Feli hian Ṭhazual Award 2018-ah khan he hla hi a lo perform tawh a, mit leh beng a tlai hle a nih kha. He hla phuahtu Myztic Sailo hian Ṭhazual Award-ah hian Best Song Writer award a dawng bawk a ni.
Tun ṭumah hian DJ Lalvenhimi chuan 'Ni thar duhawm' tih hla hmangin pahnihna a hauh a, pathumna chu Rpa Ralte ft G'nie-te an ni. DJ-i hian he a music video hmang hian Ṭhazual Award-ah khan Best Music Video a dawng a, a hla mai bakah video pawhin belhchian a dawl hle a ni.
Tunlai lengzem singer zinga 'hot' ber pawl Kimkima chuan a hla thar 'I zun ngaih lunglen' hmangin palina a hauh a, chart-ah kan hmu zui zel a nih pawhin a mak lo ang. Kimkima hla thar hian rimawi ngainatute beng a titlai tak zet a ni.
Top 10-ah hian Ticos Darhminglaina, Essy, Jojo, Manuna & Feli Fanai, Fela Colney leh Mathlenga-te an lang bawk.