India ramah Mukesh Ambani a hausa ber

Forbes chanchinbu chuan India rama mi hausa 100 a tarlang a, chung hausa zate zingah chuan Mukesh Ambani a hausa ber.

India rama 4G phone service tichhuak a, India mipuitena internet awlsam zawka chak zawk an hman theih nana hma latu, Mukesh Ambani hi India rama pa hausa ber a ni a, a hausakna chhan ber chu Jio emaw, Reliance emaw vel ni loin petrochemical lam, oil leh gas te a ni.

Fa pathum nei tawh, kum 59 mi Ambani hian zirna lamah chuan Bachelor of Science in Engineering, University of Bombay-ah a zir a, chumi hnuah Stanford University-ah kalin a zir tluan chhuak ta lo. Forbes chanchinbuin list pawimawh a tihchhuah, Billionaire 2016-ah 36-na a ni a, nikuma Powerful People a tarlanah 36-na a ni bawk. Tun December thla thlenga a hausakna zawng zawng hi USD tluklehdingawn 22.8 lai a ni.

Damdawi siam chhuah lama mi hlawhtling, Dilip Shanghvi chu India rama pa hausa ber dawttu a ni a, USD tld 14.3 zet a nei. Ani hi rokhawm vanga hausa pawh ni lo, ama thawhrim avang liau liaua hausa a ni. Nikum pawh khan pahnihna a ni a, amaherawhchu nikum aiin kuminah a hausakna a tlahniam hret a, USD tld 1.1 zetin a nei tlem tawh zawk a, chuti chung chuan pahnihna a la ni pha tho.

Hinduja Group neitu, Hinduja Family hi hausaka pathumna a ni. Kumina Forbes-in Asia-a chhungkaw hausa a tarlanah 10-naah an lang a, Billionaires List tihchhuahah 58-na a ni bawk. Unau pali, sumdawngho an ni a, kumin July thla khan India chhim lama thermal power plant, megawatt 1,040 pe chhuak thei chu an commission. December thla thlenga an hausakna hi USD tld 13.9 zet a ni.

USD tld 15 zet nei Azim Premji chu palina a ni a, construction lama hlawhtling, Pallonji Mistry chu pangana niin USD tld 13.9 a nei. Lakshmi Mittal chuan USD tld 12.5 neiin paruknaah a lang a, Godrej chhungkua chuan USD tld 12.4 an nei a, pasarihnaah an lang. Software service lama hriat hlawh Shiv Nadar chuan USD tld 11.4 a nei a, Kumar Birla chuan USD tld 8.8 a nei a, vaccine lama hlawhtling, Cyrus Poonawalla chu 10-na a ni.