Lehkhabu bawm : ‘Genre Hran (Nihphung Danglam)’ tlangzarh

Zo Sanga lehkhabu ziah, ‘Genre Hran (Nihphung Danglam)’ chu IPR, P&S minister B. Lalchhanzova chuan nimin khan a pisa-ah a tlangzarh. Zo Sanga hi Indiana, USA-a cheng mek a ni.

Minister B. Lalchhanzova chuan ram pawna awm Mizo ten Mizoram leh an Mizo puite ngai pawimawh a, kawng hrang hranga inzawmna an rawn siam chu hlu a tih thu a sawi. America ram aṭanga Mizo lehkhabu, mimal ziah hmasa ber tlangzarhtua a ṭang chu a ngaihhlut thu sawiin, Genre hran (Nihpung danglam) chu a hming ang ngeiin a danglamin Mizo mipuite tan hlawkna tam tak chhar tur a awm a rin thu a sawi.

Hun hman hi Prof RL Thanmawia chuan kaihruaiin, Dr H. Laldinmawia’n Lehkhabu thlirlawkna a nei. Dr. H. Laldinmawia chuan, “Genre Hran ah hian phek 309 awmin bung 91 zet a awm a, bung tin hi chhiar nuam tawka tawi leh fel a nih bakah mi tin mil a ni” a ti. Lehkhabu ziaktu Zo Sanga hi kum 2000 vela USA a chhuk thla a ni a, tunah hian US Potal Service, Pennsylvania State University ah a thawk mek a ni.