DDK Zo Awi Zunzam Gnat-a pualin hmang dawn

Doordarshan Kendra Aizawl in zaithiam leh hla phuah thiam fam tawhte puala a buatsaih ṭhin, Zo Awi Zunzam Episode 20-na chu zanin dar 7-9 hian neih leh a ni dawn a, Gnat Lalrinchhana pualin hun hman a ni ang.

'Ngaihzual' hitmaker Gnat-a hi a hunlai khan Zoram dengchhuak khawpa lar a ni a, a zai thiam piah lamah infiamna lamah pawh Mizoram mai ni lo India tihmingṭhatu a ni. Kum 2013 January 13 khan chesualin a boral a, a chenna Nursery Vengah vui liam a ni.

Zanina hun hman turah hian tunlai zaithiam lar ber pawl leh huhang ngah ber zinga mi Lalsangliana (Taitea) a inlan dawn a, a fan-te tan chuan hmaih phal chi a ni lo ang. Youth Icon star hian Gnat-a hla a lo sa fo tawh ṭhin a, zanin hian a zaithiamna hmangin Gnat-a hriatrengna atan Zoram mipuite min awi leh dawn a ni. Mizo Idol star David Darlong pawh a inlan dawn a, a zaithiam zia chu sawi nawn pawh a ngai awm lo e. Zaithiam lar leh zeihawi Jaui bakah Shai Hills vocalist, Crystal Malsawmi a inlan bawk ang.

YSM vocalist, tunlai tleirawlte’n an duh em em Daniel-a pawh a zai dawn a, rockstar Lungmuana a rawn comeback dawn bawk, zanin chu mit leh beng a tlai dawn hle a ni. Zaithiamte hian Gnat-a hla pahnih ṭheuh an sa dawn a ni. Programme hi DD Mizoram YouTube channel-ah live-a pek chhuah a ni dawn a, TV lamah DD Mizoram Channel-ah pek chhuah a ni dawn bawk.