Google-in A24-ah AI hmanga film siamna tihchak nan USD mtd 75 invest

Khawvel technology lama hmahruaitu, Google leh independent film studio lar, A24 te chuan Thawhlehni khan film siamnaa pui thei tur artificial intelligence (AI) hmanrua tihhmasawnna turin thawh dunna an siam tih an puang. He thawh dunna atan hian Google chuan A24-ah USD maktaduai 75 zet an invest.

A24 hian Backrooms leh Marty Supreme te ang film hlawhtling tak tak an lo siam tawh ṭhin a; he inremna hnuaiah hian Google-a DeepMind AI research unit te nen thawk hoin, film director leh thiamna hrang hrang neite tana hmanraw chhawr tlak tur khawl thiamna thar an buaipui dawn a ni. Hetiang hian Hollywood studio leh AI company-te thawk dun fo tawh ṭhin mah se, tun ṭuma Google leh A24 inremna erawh a danglam hle. Google hian A24 film hlui dahkhawmna 'film library' leh an data-te erawh a khawih tel dawn miah lo thung a ni.

A24 Labs hotu Scott Belsky chuan tun hnaia AI siamtute'n film siam tihtlawm leh tihchak nana AI an zawrh ṭhin chu thil hriat sual a nih thu a sawi. An hmanraw siam tur hi mipui tana hmuh hrehawm tur chi 'prompted generative AI' thumal hmanga video siam chawp a nih dawn loh thu leh, film siamtute thluak leh thiamna humhim tura hmanraw buatsaih a nih tur thu a tarlang.