Fashion Fiesta Silk Couture
Silk Couture 2016 chu mit leh beng a tlai hle a, Mizorama show awm tawhah chuan a changkang leh designers-te fuankhawm kim ber ṭum a ni hial awm e. Kar hnih lam daiha thil thleng tawh ni mah se Mizorama show awm zen zen lo anih vang leh a designers te hi Zoramina kan neih ṭhat ber berte an nih miau avangin tlem azawng han thai belh hram loh chuan a uiawm dawn em a, kan thai poh aniang chu.
Zan dar 6:15-ah Ṭhuampui lam panin thlen hman loh hlau takin kan inkhalh phei a, Chaltlang chhuk thla kan tlan lai aṭang tawhin hla vak lova Helipad Station-a van lam hawi zawnga êng che vel chu a hmuh theih tawh a. A hmun kan thlen meuh chuan an mi sawm mi pawimawh leh challang tak tak te, sipai lam thlengin an fuan kim hle. Dar 7:00 a rik meuh chuan ṭhutna tura an duanah chuan mipui kan ṭhu khat ṭhap tawh. Han hawi vel ila ding leh veiah designer lar tak takin min hual ṭhup a, kan thleng a, beautician leh stylist, hemi zana model-te nalh tak taka cheitu Hlua Chhakchhuak, Style & Go chuan min lo chiauau a, kan piah lawkah NIFTIAN-ho Mami Zote leh Afaki Hauhnar te an ṭhu a, kan hma deuhah Adiki Darngawn a ṭhu. Kan thlen hnu lawkah Engmawia Escape lo thleng vein Muanpuii Chinzah pawh Coat Beige Colour nalh tak nen a rawn inṭhuam a, Rinliana Chhangte pawh a ṭhian designer tho Nonoi nen rawn inlanin designer chul thei lo, Numami Magic N vhu Lunglei lam aṭangin hun chep tak karah a rawn phei vang vang a, Overcoat nen kan hmu leh a. Chutah ṭan hnu lamah Vakiria lam Sangzeli Hmar leh Tei Hmar te leh Teremi Ralte te an rawn thleng ve leh bawk a. Sawi hmaih phal loh, ka bulah Ve Ruata ṭhuin show chhung zawng hian ṭawng kan inchuh a ni deuh ber mai.
Host zei em em mai Rini Hlawndo chuan hun rawn hmangin kan Chief Minister zahawm tak Pu Lal Thanhawla’n a hawnna hun min rawn hmansak a, Mizo Dance Camp lam zei tak maiin an rawn inlan. Chutah a hmasa ber atan Pi Lalṭanpuii, Zozia Silk Tlangnuam chuan show rawn neiin, Model-te khawvela Silk man to ber, Muga Silk an tiha siam thuam rawn inbelin bul an rawn ṭan a, heng silk hi khawvel pumah NE India-chauh a chin theih a, kg 1 ringawt pawh Rs. 1500 man chu kawr, puan bih chi leh stole-ah te rawn lantirin, ze mawi tak tak Phengphehlep, lenbuangṭhuam design te kan hmu. Heng bakah hian silk pangngaiah puanchei tawlh loh leh hmarâmah te kan hmu bawk. Heng bakah hian senior design chi hrang hrang disul leh tuibangpui te rawn lantir lehin, a rem tur tak top design simple leh nalh tak mai design 16 rawn neiin, amah Pi Lalṭanpuii, Ministry of Textile, Govt. of India-in September 2014-a Women Achiever in Sericulture a lo hlan tawh nu tumruh leh sulsutu chuan model rawn chhuahpuiin show hmasa ber chu a rawn ti tawp. Show bakah hian zaithiam tak Crystal leh Bruce chuan min awi a, Mizo Dance Camp tho khan lâm dan sequence kan la hmuh ngai zen zen loh rawn perform lehin, he contemporary dance zet hi chuan mit a tlaiin, ni danga Mizo lâm kan hmuh nen chuan danglam tak a ni. A sequence duangtu Joshua Sailo a thiam thlawt.
Hemi zawhah hian silk collection pahnihna Heritage Mizoram, Charlee Mathlena design zet zawng ṭum danga a collection ang bawkin mit a tlaiin a nalh dangdai leh hle. Eri silk an tih mai, kuta tah ngei mai hmangin a rawn siam a, a collection-ah hian shoul leh stall-te leh resort wear kan tih mai kawr hak nuam leh awlsam simple si, changkang tho bawk si kan hmu a, a rawng hi offwhite lam rawng vek niin a design hi Mizo nawlpui hak chi chu ni chiah lo mah se a simple-na hi a changkanna belhchhahtu a ni awm e. Hei bakah hian hnang tah Sling Bag te model ten an rawn akin an rawn khai chhuak bawk. He Eri Silk hi hak a nuamin designer tam zawkin an intihhmuh chho mek a ni. He collection hming The Village Artisan tih hming lo chhuah nachhan pakhat chu amah designer Charlee hi a pi-ina a naupan tet laia puan a tahna bul vela a lo puih ve ṭhin chu helam hawi zawnga kaltirtu anih phah ta a ni.
Collection tawpna ber Pi Lucy Sailo Lucy’s Catalogue chuan a hmawr rawn bawkin Mizo designer hmasa ber pawl a nihzia a collection-ah kan hmu leh thei a. Silk rawng hrang hrang design tunlai tak si min rawn hlui a, colour in-contrast mawi tak tak kan hmu a, tunlaia an uar tak Bell Sleeve ban arh puk deuh te, off shoulder leh Chinese neck-te nen, midi skirt mawi tak, sexy si lo, mah se tunlai tak tho siin a collection kan hmu. Model Emily Chenkual hak, pencil tube dress, a par eng leh hring inpawlh chu a simple-in a nalh hle a, vawiin thlengin ka mitthlaah a la cham. Hei bakah a collection zingah Rody-i’n taksa rawng nalh tak mai a hak te leh Chhuangi’n lunghlu rawng hring leh magenta a rawn hak te chu rilruah a cham reng. Show hun chhung a rei lo va, a felfai bawk a, ninawm hman lovin a hlawkthlak a, Mizote puantah leh kut hnathawha hma lak zel ṭhatna leh pawimawhna chona nasa tak min pein show hi kan ṭinsan ta a ni.
Sawi hmaih theih loh International model Mara Moss, Russian leh Rafael, Brazillian te bakah India Next top model Gloria, Nagaland lam chhuak te a show tihlutu zingah an tel. Menswear changtlung tak la nei lo mah ila, mit titlaitu zinga mi kan mipa model pahnih Charlee collection-a Kurta fual nalh tak an rawn inbelte leh Lucy Sailo collection-a an kekawr hak dangdai tak te chu show tihlu zualtu te an ni.
Tluangpuii Hmar
Instructress
Vakiria Institute of Fashion Technology