Jesse Eisenberg-a'n Mark Zuckerberg lem chang tawh dawn lo

American actor leh filmmaker, Jesse Eisenberg chuan Aaron Sorkin-a film 'The Social Network' sequel 'The Social Reckoning' tiha Facebook mastermind, Mark Zuckerberg lem chang leh tura sawmna a hnawl tih a sawi. Kumin June thla tir lam khan Sorkin chuan Eisenberg rilru hneh turin ni thum chhung hun a hman thu a sawi a, mahse a sawm hlawhtling thei ta lo.

Jesse chuan a nunah thil thar leh tawnhriat dang a neih mek thu leh, Zuckerberg character nena inthlunzawm a duh loh thu a sawi. Mahse, he movie sequel-a a chan tawh dawn loh avang hian film chu a ṭha lo a tihna a ni lo tih sawiin, hlawhtling taka an siam ngei a beisei thu a sawi zui bawk. 'The Social Reckoning' ah hian American actor Jeremy Strong chuan Zuckerberg lem hi a chang tawh thung dawn a, Facebook engineer Frances Haugen lemah Mikey Madison, Wall Street Journal reporter Jeff Horwitz lemah Jeremy Allen White-te an chang dawn a ni.