Box Office: Sum lalut hnem ber Aquaman

December 14-a tlangzarh Aquaman chuan Box Office-ah ro a rel chhunzawm zel a, tun weekend chhung ringawt pawh khan $mtd 26 zet a lalut leh a ni. American film star Jason Momoa leh Amber Heard-te channa hi tunlai film chhuak thar zingah chuan en hlawh ber a ni mek. 

Hetih lai hian Mary Poppins Returns chu sum lalut tam ber dawttu a ni a, Spider-Man: Into The Spider-Verse chuan $mtd 13 zet a thawk chhuak ve bawk. 

He fantasy/science fiction film hi nikum December thla khan India-ah tlangzarh a ni a, a boruak a lian nghal hle. Jason Momoa leh Amber Heard-te channa a nih miau avangin beisei a sang a, rin lawk ang ngeiin Box Office-ah pawh a che ṭha hle. North America lamah hian hralh a tla hle a, a sum lakluh pawh $mtd 900 zet a tling tawh a ni. 

Tun weekend chhung ringawt khan ṭum 4,184 zet theater-ah chhuah a ni a, khawvel hmun hrang hrangah chhuah chhoh mek zel a la ni bawk. Sum lakluh kawngah hian a che ṭha hle a, kum 2012-a tichhuah The Dark Knight Rises ai khan hralh a tla zawk. 'Batman v Superman: Dawn of Justice' pawh a khum bawk a, DC Extended Universe huanga film hlawhtling ber a rawn ni ta a ni. 

Kuminah film chhuak thar a la tam lo hle a, a awm chunte erawh sum lakluh kawngah an che ṭha hle. January 4-a release Mary Poppins Returns chuan $mtd 18 zet lalutin pahnihna a hauh a, Escape Room chu top 5-ah a inhlangkai bawk. Escape Room hi January 4 tho khan tlangzarh a ni a, kar liam ta chhung khan $mtd 12 zet a lalut a ni. 

American singer Jennifer Lopez channa Second Act chu top 10-ah a la inhamtang zui zel a, $mtd 4.7 lalutin pasarihna a luah a ni. He romance/comedy film-ah hian Milo Ventimiglia leh American actress Vanessa Hudgens-te pawh an inlan a ni. 

Top 10-ah hian Bumblebee, The Mule, Vice, Ralph Breaks the Internet leh Holmes and Watson-te chu an lang bawk.

1. Aquaman - $26

2. Mary Poppins Returns - $18

3. Spider-Man : Into The Spider-Verse - $13

4. Bumblebee - $12.5 

5. Escape Room - $12

6. The Mule - $8.8

7. Second Act - $4.7

8. Vice - $4.7

9. Ralph Breaks the Internet - $4.6

10. Holmes and Watson - $3.8