WhatsApp-ah phone number thup nan 'Username' hman phal a ni dawn ta

Khawvel thiamna a sâng chho zel a, inbiak pawhna atana kan hman lar ber pawl WhatsApp pawh a changtlung leh hret dawn e! Thawhṭanni, June 29 khan Meta chuan khawvel pumah WhatsApp username thlan lawk 'reserve' theihna a hawn thu a puang ta rup mai. He thil thar hi i hman chuan, mi tharin an biak duh che pawhin i phone number hmu kher loin i 'username' chauh khan an hmu thei tawh dawn a ni.

Hmasawnna thar hi privacy kalpuina atana pawimawh tawpkhawk a ni a; hmelhriat ngai loh hnenah mahni phone number pe chhuak kher loin, i username chauh kha i pe thei tawh dawn a ni. WhatsApp hmangtu tluklehdingawn 3 chuang zet kan awm avangin, i hming duh bik chu mi dangin an lo hman khalh hma chein i lo hauh lawk a ngai ang.

Username thlang lawk tur hian WhatsApp kha a thar berah update phawt a; Settings > Account > Username ah luha siam mai tur a ni. Mahse, he feature thar hi ram zawng zawngah hman theiha tihchhuah a la ni lo thung. User name-ah hian character 3 aṭanga 35-a thui a thlan theih. Mahse, mi lar leh sorkar pisa hming te erawh mi dangin an lo hman khalh loh nan Meta hian an lo block sak thung a ni.