Chris Brown USD mtd 13 chawi turin hriattir

American singer Chris Brown 2020-a a ui vulhin a intifaitu a seh avanga hliam na tak a tawrh chungchangah thiam loh chantir a ni a, Brown leh a company Black Pyramid LLC chu USD mtd 12.9 chawi turin Los Angeles court chuan a hriattir.

Kum 2020 khan Tarazana, California-a Chris Brown in a tihfai laiin Maria Avila chu Brown-a ui, kg 90-a rit Caucasian shepherd, Hades chuan beiin a seh a, a hmaiah hliam na tak turin a hmelhem zui phah a, a khaw hmuh a fiah loh phah bakah nerve ṭha lo a nei zui bawk. Brown chuan ui hi security atana hman a nih thu leh, a mimal vulh a nih loh thu a sawi. Uiin Avila a beih hnu hian Brown hi hmun dangah tlan chhiain, a mi chhawrte chu Avila hi a buaipui tir nia sawi a ni bawk. Brown hi R&B singer Usher nen US ah tour an nei mek a, hetihlai hian kum 2023-a nightclub-a music producer a bei nia puhna thubuai chu October thla hian UK-ah ngaihtuah a ni ang.