San Diego Comic-Con ah ENHYPEN

K-pop boy group lar, ENHYPEN chu July 23-26 chhunga US-a San Diego khawpuia Comic-Con neih turah an inlan dawn. An group hian an webtoon leh anime, 'Dark Moon : The Blood Altar ' an promote dawn a ni.

ENHYPEN hian Blood Saga World Tour an nei mek a, July 21-ah San Diego-ah hian show an nei dawn a, Comic-Con ah hian an inlan nghal dawn bawk a ni. An pualin booth siam a ni dawn a, group member - Jungwon, Jay, Jake, Sunghoon, Sunoo leh Ni-Ki te chu webcomic creator-te nen panel-ah awm hoin, 'Dark Moon' hmalam hun turte an sawi ho ang. Hei bakah off-site event, 'Dark Moon Blood Night' chu an fan, Engene pualin buatsaih tum a ni bawk. ENHYPEN hian thawnthu thlur bing, lore neiin vampire chungchang a ni. 'Dark Moon' pawh hi an lore behchhana siam niin, a concept hi an concept film, music video, HYBE webcomic leh tun hnaia an animated series chhuakah te tarlan a lo ni tawh bawk.