AI hmanga siam micro-drama ‘Mohini’ track hmasa ber tlangzarh

Technology ṭhang zelah entertainment lam thlengin Artificial Intelligence (AI) hian hmun thuk tak a luah chho zel a; India-a AI hmanga musical micro-drama siam hmasak ber ‘MOHINI – Khud Se Pyaar’ a an track hmasa ber tur "Angaat Aalay Ka" chu tlangzarh a ni ta.

He micro-drama hi Equinox Virtual leh thawnthu ziakmi Amita Madhvani kutchhuak a ni a, Google Cloud nen thawk duna an siam a ni. He series-ah hian nula kum 25 mi pakhat, a thinlung chhunga harsatna hrang hrang leh khawvel a hmachhawn dante tarlan a ni. Film-ah hian Kathak lam, hla leh thawnthu kalhmang chawhpawlh hmuhnawm takin an chhawp chhuak a, Instagram leh YouTube lamah te tlangzarh tawh a ni a, ṭhalaite ngainat chi tak tura duan a ni bawk.

Mihring thiamna leh AI chawhpawlh dan chungchanga zawhna hrang hrang awm chho mekah, film siamtu Amita chuan, "AI hian thawnthu a ziak lo a, thawnthu ziahsa chu hmuhnawm zawka phochhuah nan chauh kan hmang a ni," tiin a sawi. He project-ah hian mi panga chauh team-ah hian an thawk a, khawvel hmasawnna thar entirna ṭha tak a tling.