May-i kan chân ta

Zaithiam, rapper leh hla phuah thiam ni bawk May Lalbiaknungi, May-i tia hriat lar chu nimin zing dar 9.15 khan kum 25 mi niin a thi.

May-i hi May 4, 1994-ah piangin Chaltlang-ah a khawsa a ni. LPS leh MZI-ten Onstage an buatsaih aṭangin mipui hriat a hlawh chho ṭan a, a hla Beiseina leh G'nie nena an sak dun 'Dawt'-te chu larpui hlein, 'Dawt' phei hi chu tleirawl tam berin an zawm theih tur hla a ni nghe nghe.

October thla tir lam khan a insawisel ṭan a, ni thum vel a insawisel hnuah October 9 khan LRM Hospital-ah an inentir a, chutah chuan lo admit zui nghalin septicemia a ni tih hmuhchhuah a ni. ICU-ah enkawl zui nghal niin, ziaawm lam pan thei loin a hnuah phei chuan mitliam bakah a kalin hna a thawk lo tih hmuhchhuah zui a ni a, a chuapah tui a tlin bakah a pumah 'bleeding' a awm tih hmuhchhuah a ni leh ta zel bawk a ni. 

A natna a zual zel avang hian October 29 khan  Civil Hospital, Aizawl-ah sawn niin, hetah pawh hian ICU-ah dahluh lehnghal a ni a, a thih thleng hian Civil Hospital, Aizawl-ah hian a awm ta a ni. Mizo rimawi khawvela hmabak eng tak nei, Mizo-ten hmeichhe rapper kan neih tlemte zinga mi May Lalbiaknungi thih thu hi 'Dawt' ni hram se titu an tam ngei ang.