World Cup-in entu tam lamah record siam

FIFA World Cup khelh mek chuan "The Greatest Show on Earth" tih a nihna tichiang nawn leh turin entu tam lamah record thar a rawn siam. Kumin WC-ah hian US-a Spanish ṭawnga tihchhuahna Telemundo, Universo leh Peacock streaming-ahte kum dang aia entu tam lamah record thar a siam.

Tarlan danin, group stage chhung khan inkhel entu an tam hle a, Mexico leh England inkhel phei kha chuan Spanish media chanchina football match entu ngah ber a ni pha hial a, entu maktaduai 23.2 zet an tling phak a ni. Report-in a tarlan danin, chawhrualin inkhel pakhat maktaduai 5.7 zelin an en a, hei hi kum 2022 aiin zaa 157-in a tam zawk. Mipuiin inkhel ena hun an hman zawng zawng pawh minute tluklehdingawn 61 zet a tling tawh a, kum 2018 leh 2022 World Cup inkawp ai khan zaa 41-in a tam zawk a ni.

TV pangngai aia online streaming hmanga entu an pung nasa hle a; group stage chhung ringawt pawh khan entu zawng zawng aṭanga 48% chu Peacock leh Telemundo kaltlanga thlirtute an ni. Peacock lamah chauh pawh chawhrualin minute khatah entu maktaduai 2.6 zet an tling ziah bawk.