Manuni music video thar 'Eng ka hmu ta' kan hmu hnai

Hun eng emaw chen a reh hnuah Manuni chu hla thar nen kan hmu leh dawn hnai a, a music video thar 'Eng ka hmu ta' chu Zonet lamah en theih turin tihchhuah thuai a ni dawn.

'Eng ka hmu ta' hi Hillsong Worship hla 'See the light' Mizo ṭawng­a lehlin niin, amah Manuni hian a letling a ni. He hla hi Hillsong-a worship pastor Reuben Morgan leh hla phuah thiam Ben Fielding-te phuah a ni. Video hi Chiangtea Videography siam niin, recording hi Foster Record-a tih a ni bawk.

'See the light' hi Hillsong album 'Awake' ami kha niin, he album an tlangzarh hma July thla khan Manuni hi  Hillsong Conference, Sydney, Australia-ah a zuk tel ve a, hetah hian he hla hi Hillsong hian sain Manuni hian nalh a ti hle a, Mizo ṭawngin a letling ta tih Vanglaini a hrilh.

"Conference-ah hian Hillsong worship leader nung tak tak- Brooke Ligertwood, Joel houston, Reuben Morgan leh Taya Smith-te pawh an tel a, conference zawh hian Brooke Ligertwood hian ka lu chungah kut nghatin min ṭawng-

ṭaisak nghe nghe a, ka nihlawh ka inti hle a ni," tiin Conference-a a tel chungchang hi a sawi.

Manuni hi rawngbawlin a chhuak nasa hle a, Hillsong Conference-a a tel hnu hian Melbourne-a Zohnahthlak unaute hnenah rawngbawlna neih chhunzawmin, Bangladesh lamah rawngbawlna a nei leh bawk a ni.