Lehkhabu bawm: 'Zirtu Zir Lai' tlangzarh; 'ramada 19' tlangzarh nawn

Zirsangkima lehkhabu thar, 'Zirtu Zir Lai' tih chu July 21, Thawhlehni khan Zarkawt Community Hall-ah Lalnunpuia Hrahsel chuan a tlangzarh. Hemi rual hian kum 2013-a a lo tihchhuah tawh, 'ramada 19' chu tlangzarh nawn leh a ni a, novelist lar C. Lalnunchanga'n a tlangzarh.

Lehkhabu tlangzarh inkhawm hi Lalrammawia Ngente in a kaihruai a, 'Zirtu Zir Lai' thlirlawkna hun hi Lalvansanga Pautu, The Zozam Times ina hmang. Lehkhabu tlangzarhtu Lalnunpuia Hrahsel chuan 'Zirtu Zir Lai' chu birthday lawmna thilpek atan pawha inpek chi, naupang bakah ṭhalai zawkte tan pawha chhiar chi a nih thu sawiin, hetiang ziak thei an awm hi Mizote vanneihna a nih bakah, mitin chhiar theih a nih avangin a hlu hle a ni, a ti.

'ramada 19' thlir nawnna hun chu Dr. H. Laldinmawia'n a hmang a, Dr. Dorothy Zonunsangi leh R. Lalfakzuali ten lehkhabu chungchanga thlirna hrang hrang an nei bawk.