HONTRADE INTERNATIONAL THAZUAL Fakna-ah Sawmtea 'A va mak em' a sang ber

Hontrade International Ṭhazual Fakna chart thar berah Sawmtea 'A va mak em' tih chu pakhatna a ni. 

Chart hmasaah khan Sawmtea hla hi pathumna a ni a, mahse tunah chuan 'A va mak em' tih chu thlan hlawh ber niin dinhmun sang ber a rawn luah ta a ni.  Chart hmasaa pahnihna, Lalhmangaihzuali (Nunui) 'Hremhmun' chu a dinhmun a la danglam lo a, pakhatna lo hauh tawhtu Lalthlengliani 'Jehova Elohim' chu pathumnaah a tla thla ve ta thung. 

Sawmtea'n thiam taka a sak, 'A va mak em' tih hi sap hla aṭanga lehlin a ni a, a letlingtu hi Manuna Lianhna, Aizawl Area Baptist Choir conductor a ni. Soundtrack hi Lal K Sailo siam niin, recording hi Princeton Recordings-ah a ti thung.  

Shooting hi Kolkata-ah Eco Park-ah neih a ni a, a hmun a mawiin a hla nen pawh a inmil viau mai. He hla hi Pathian thilsiam ropui leh mawizia, Pathian remruatna ropui leh themthiamzia puanchhuahna a ni.  Sawmtea pawh hian a hla thu hi a duhin a ngaihlu hle tih Vanglaini a hrilh. He hla vangin Sawmtea hian Ṭhazual Award sem turah Best Male Artist Gospel nomination a hmuh phah bawk. 

Tun ṭum Ṭhazual Top 10-ah hian mi thar pahnih, 7-na Grace Lalchhanhimi 'A kiangah' leh 10-na Jennie Lalruatfeli 'Lalpa nang lo chu' an rawn lang thar. Sanga Renthlei ft Hlimhlimi 'Ni ropuiah chuan' tih chu palinaah rawn kai chhoin, hma a sawn zel a rinawm. Ruatpuii 'Ka lawm e Lalpa' tih pawh chart hmasaa pakuana aṭangin pangana-ah a rawn inhlangkai bawk. Chart hmasa lama kan lo hmuh tawh, Hmingtea Chhangte, R. Lalruatsangi leh Ruthi CVL Muanpuii te pawh Top 10-ah an la lang chhunzawm zel.