ASEAN Cup-ah India inlan dawn

FIFA buatsaiha a vawi khat nana neih tur, South Asia ramte inelna, FIFA ASEAN Cup-ah India a inlan ve dawn a, group stage-a an hmachhawn turte a chiang tawh.

ASEAN Cup-ah hian ram 14 an inel dawn a, ASEAN Football Federation (AFF) hnuaia ramte chu direct-in an tling nghal a, India, China leh Hong Kong te chu a hranpaa sawm an ni bawk.

AFF ram zingah Australia chuan inelna hi a hmachhawn dawn lo a, China-in sawmna a hnar bawk. Team 14-te hi ranking behchhanin, Premier Division leh Challenge Division-ah ṭhen an ni.

Premier Division-ah hian team pariat awmin, group pahnihah ṭhen hran an ni a, group-a a sang ber ve vein final lut nghalin, champion an inchuh ang - India hi group A-ah Indonesia, Malaysia leh Singapore te nen an awm ho.

Group B lamah hian Vietnam, Pakistan, Thailand leh Philippines an awm thung a, inelna hi September international break-a neih tur niin, September 21-ah an ṭan ang a, October 6-ah khelh zawh tura ruahman a ni.

Challenge Division lamah hian team paruk awmin, group pahnihah tho ṭhen an ni a, anni pawh hi group hmahruaitu ve vein champion nomawi an inchuh ang.

ASEAN Cup khelte hian participation fee-ah $125,000 (nuai 119.48) an dawng dawn a, Premier Division Champion hian $1mtd (nuai 955.70) an dawng ang a, Challenge Division champion hian $300,000 (nuai 286.67) an dawng thung dawn a ni.