Vanglaini Bihchianna: Mizoram Academy of Arts

Mizoram chhunga arts kaihhnawih hrang hrang - Painting, Sculpting, Print-making leh Pottery lam hmun khata zir vek theihna leh Diploma course zirna Government approve awmchhun, Mizoram Academy of Arts, Mission Veng chu Vanglaini chuan a bihchiang a.

Bul ṭan dan:

Mizoram Academy of Arts hi kum 2023 March thla aṭang khan kalpui ṭan niin, hmun hrang hranga Master of Fine Arts-a specialist zir chhuak rual ten an din a ni. Bul ṭannaah hian school pangngaia anga kalpui phawt niin time shift hrang hrangah zirlai naupang a duhte tan zitirna hi an pe ṭhin. Hun eng emaw chen kalpui a nih hnuah Higher and Technical lamin an pawmpui hnuah Diploma course pawh kalpui chhunzawm a ni leh bawk.

State chhunga arts lam zirna mumal leh changtlung zawk neih ve duhna aṭanga rawn din chhuah a nih angin, zirlai pawh lak belh zel a ni a, an zirtirna leh hmalakna hrang hrang hnuaiah zirlai hlawhtling leh thiam tak tak, eizawnna tlak tura arts peng hrang hrang painting, sculpture, leh pottery-te bakah print making thlengin zirtirnate pek an ni.

Hmalakna:

Arts lam zirna a hlawhtlin theihna tur hian Academic lam thawktu bakah board member paruk an awm. Academy hmalakna hnuaiah hian Arts workshop, exibition leh expo hrang hrangahte an kutchhuak leh thiam thilte hi pholan a lo ni tawh ṭhin bawk. Academy a nih avang leh zirna in anga kalpui a nih bawk avang hian an kutchhuakte hi hralh leh suma chantir lam an buaipui lo thung a, a duh tan erawh order siam theih a ni.

Tun hnaiah sorkar department hrang hrangte nen ṭangkawpin exibition-te buatsaih ṭhin a ni. An hnuaiah hian zirlai ni lem lo mahni duh thua therapy anga rilru ipik leh tawt paih thawl nana hmang ṭhin pawh an awm ṭhin thu MAoA Principal Andrew Lalremruata MFA Sculpture chuan Vanglaini a hrilh.

Hnathawktu & Zirlai:

MAoA hnuaiah hian board member bakah thawktu mi pasarih awm mekin, an vai hian MFA zir chhuak vek an ni. Mizo zinga MFA hmasa ber Isaac Malsawmtlunga pawh visiting faculty a ni mek bawk. Academy hnuaiah hian visiting faculty hi pathum an awm a, anni kaihhruaina hnuaiah hian diploma course latute zirtirna mumal tak, eizawnna tlak chu pek ṭhin an ni.

Academy hnuaia regular taka kal zirlai hi 17 bawr awm bawkin, course pangngai la kher lo time past leh mahni tuina avanga shift hrang hranga class kal ṭhin naupang leh puitling an awm bawk.

Harsatna:

MAoA hi kum 2023 chauha din, kum naupang tak a la nih avangin harsatna chu kawng hrang hrangah lian tham lo mah se a awm ve reng tih an sawi. Harsatna tawh zingah chuan campus duhthusam la awm lo chu a lian tham ber a la ni rih a, hengte bakah NEP-in a phut anga zirna in hrang hranga thawk tur tirh chhuah kawngah skill base thiamna a ngaih avangin NEP leh sorkarin a phut ang mihring tirhchhuah kawngah indaih lohna a na zual hle bawk.

Zirna in lamah Arts lam chawilarna tur subject zir tur mumal awm lo hian Mizo zingah Arts lam thuk zawka zir duhna nei a titlem a, hei hian kawng eng emaw chenah academy ṭhanna tur a tlahniam phah a, Arts lam zirna chawi lar kawngah harsatna a thlen ve deuh niin Vanglaini an hrilh.

Thurawn:

MAoA staff-te chuan ,"Eng ang eizawnna pawh thawk ila, mahni thiamna tak tak a awm a nih chuan eizawnna inang rengah pawh eng emaw thlak danglam zeuh emaw mi dang tih dan ang chiah lo deuh a insiamrem theih a pawimawh. Hmalam hun chu kan sawi thei lo, mahse, Arts lam tui mi tan chuan freelance ang pawhin hmalam hunah chuan a la kal theih zel a rinawm a, hei bakah State pawn lamah pawh thawh tur a awm bawk avangin, beidawng loin theih ang ang a hmalakna kawng dap chungin mahni thiamna tuaihriam zel turin inzir peih ila a ṭha" tih ṭhalaite an fuih.