'Michael 2' filming ṭan dawn hnai

Lionsgate chuan American singer-songwriter leh dancer, Michael Jackson biopic 'Michael' sequel siam tum a nih thu leh, filming pawh neih ṭan thuai a ni dawn tih an sawi. Studio chuan production chu kumin kumtawp lam emaw, nakkum kumtir lamah neih ṭan beisei a ni tih Lionsgate motion picture chief, Adam Fogelson chuan Ningani khan a sawi a, film hi kum 2028-a tlangzarh tum a ni.

Kumin April 24-a tlangzarh 'Michael' kha box office-ah a cheṭha hle a, khawvel pumah USD tld 1 a la lut tling tawh. Film director hi Antoine Fuqua a ni a, film hmasaah hian Jackson-a u fapa, Jaafar Jackson a chang a ni. Fogelson chuan film sequel-a an senso tur zat a la tarlang lo a, mahse company chuan material ṭhenkhat chu shooting an neih tawh sa aṭanga lak a ni dawn tih a sawi.