Short & Documentary Film Festival hawng

North Eastern Council (NEC) bultumin nimin khan IPR Lianchhiari Rûn-ah Information and Public Relations department leh Entertainment Society of Mizoram (ESM) ṭangkawp chuan 'Film-Fest 2026 (Short & Documentary Film Festival)' an buatsaih a; IPRPS secretary Betsy Zothanpari Sailo-in a hawng.

Film-Fest hi vawiinah chhunzawma zawh a ni dawn a; lemchan (film) lama mithiamte nen zirhona hun (master class) buatsaih a nih bakah a duh apiang en theih turin Mizo film tihchhuah (screen) a ni.

Betsy Zothanpari Sailo chuan, film industry chu intihhlimna ngawt ni loin, eizawnna kawng hrang hrang siamsak theitu, hnam ziarang pho chhuahna leh hnam humhalhna hmanraw pawimawh tak a nih thu a sawi a, "Short film leh documentary film chuan film industry huang chhungah hmun pawimawh tak an luah a, film siamtute leh ṭhangthar film industry lama luh tumten huang zauh zel ang che u," a ti.

Film ṭha siam tur hian hnam dang leh ram dang ngai loin, Mizoram chhungah pawh khawvel hmaa pholan tlak thil thar leh ṭha zawk tam tak a awm thu sawiin Betsy Zothanpari Sailo chuan, "Film lama hmasawnna turin kumin March thla khan Lemchan–Film Festival pawh IPR buatsaiha neih a lo ni tawh a, heng hunte hi film lama tui mite tan inpho chhuahna leh an thiamna tihpunna hun remchang a ni," a ti a; Mizoramin hmunhma ṭha a neihte pho chhuak tam turin Mizoram film industry lama inhmangte a sawm.