Grammy-in Asian Pop Award chungchang ngaihtuah nawn leh maithei!

Grammy Awards buatsaihtu, Recording Academy chuan kum 2027 Grammy Awards neih tur atana an duan thar, 'Best Asian Pop Music Performance' category chu siam ṭhat leh an inhuam thu an puang. He thu hi Recording Academy CEO Harvey Mason Jr. chuan Zirtawpni liam ta khan thuchhuah siamin a tarlang a ni. Kum 2027 Grammy Awards atan hian August 21 thleng candidate inpek luh theih a ni ang.

K-pop group lian leh lar BTS-in an album thar ‘ARIRANG’ chu Grammy Awards-a an category tharah hian inel tir an duh loh thu an puan hnuah he thutlukna hi a rawn chhuak a ni. BTS hian music hi ṭawng leh ram anga inṭhenna awm loa kalpui zawk a nih an duh thu an tarlang.

Mason Jr. chuan artist eng emaw zatin he category thar hi an hla leh rimawi thawhchhuah hlutna phu tawk loa thliar hranna ni zawk anga an ngai a nih chuan, chumi chungchang chu uluk taka ngaihtuah thar zui an peih thu a sawi. Recording Academy hian Asian pop music hmasawnna chhawm nun tumin K-pop, J-pop leh C-pop-te huam tel theihna tur he category hi an siam a ni.