Metallica in California ramkang tuarte ṭanpuina pe

Heavy metal band, Metallica chuan US-a California state-a ram kang tuartute ṭanpuina turin US dollar 100,000 an pe. Nikum khan hetiang zah bawk hi ṭan­puina an lo pe tawh bawk. 

California state-ah ram nasa tak a kan avangin mi tam takin harsatna an tawk mek. California hmarlama Kincaid fire chuan ram acre 75,000 chuang a kang chhe tawh a, chhim lamah Maria fire chuan ram acre 9,000 zet a kangchhe tawh bawk. Ram kang ṭhelh hna hi theihtawpa thawh zel a ni.

Metallica chuan, "Kum thum chhung a zawnin ram hi nasa takin a kang tawh a, mi tam takin harsatna an tawk mek a ni," a ti. Ram kang tuarte ṭan­puina an pek hi chhawmdawl hna thawktu, Sonoma County Resilience Fund leh Wildfire Relief Fund  hnenah $50,000 ve vein an pe tih an sawi bawk. 

Ram kang ṭhelhtute chu an theih ang anga pui tur leh, kangmei tuartute  ṭanpui na, sum fai a nih kher loh pawhin ei tur leh thawmhnawte pe turin midangte an ngen. December 26 hian Metallica hian children's book, The ABCs of Metallica tih chu an tlangzarh dawn a, heta aṭanga an sum hmuh ṭhenkhat an band charity foundation tan an dah ang. 

Actor Matthew McConaug­hey pawhin  California ram kang buaipuitute tan chaw a lo siam sak tawh bawk. Kar liam ta kartawp khan McConaughey hian California-a fire station hmun 20 chuangah dinner 800 a buatsaih sak a, kawtthlerah in nei lote tana ei tur chaw 800 chuang a buatsaih sak bawk.

Los Angeles-ah hian “With Thanks” campaign chu McConaug­hey leh a hote hian an nei mek a, he campaign kaltlang hian California chhim lama kangṭhelhtute tana chaw pek hna an thawk a ni. California ram kang tuarte ṭanpuina tur hian WWE wrestler leh actor John Cena pawhin $500,000 a pe tawh bawk.