CKṬP-in film puitling buatsaih dawn

Central KṬP-in KṬP Kumpuan 2020-2021 'Pathian hnaih' behchhana film puitling, feature length film a buatsaih tura chang turte Pathian hnena hlanna leh, film khuhhawnna chu Thawhlehni zan khan Chaltlang South Kohhran Hall-ah neih a ni. 

CKṬP film buatsaih tur hi Lalnunsiama'n a direct dawn a; ani hi  SVP neitu, Siama tia hriat lar, Nunna Thar film buatsaihtu zinga mi leh music video siam lama kuthnu ngah tak a ni. Scriptwriter hi Nunna Thar script ziaktu tho, H. Zosangliana a ni. Crew member-ah hian mi tam takin kan hriat lar sa an awm nual a, designer hriat hlawh tak Tluangpuii Hmar, Axis band vel aṭanga hriat lar Joe Ralte leh,  Dr. Luke drummer ṭhin Jerome te an tel.

Film-a changtu turte zingah pawh Mizo mipuiten kan hriat lar tawhsate an awm nual dawn. Nunna Thar leh Thingtlang Tlangval lama kan hmuh Papuia Pachuau te; Comedian Search aṭanga kan hriat lar Lalchharliana te; zaithiam, Dâm Veng Praise Group-a mi, Zonet Ṭhazual chart-a 'Va chuan nang che' hla hmanga pakhatna lo luah tawh Didiki te chu a langsar zual an ni.