World Photography Day pualin Photo Art Exhibition & Competition buatsaih

World Photography Day kum 187 tlinna pualin nimin August 19 khan Mizoram School of Photography leh Photography Club of Mizoram-te bultumin Millennium Centre, Atrium-ah Photo Art Exhibition neih a ni. Photo Art Exibition vawi 10-na hi Vanlalhuma, Ambassador IFS(Rtd) chuan hawngin, ni li chhung awhin August 22 khian khar a ni ang.

MSP leh PCOM dintu leh exhibition chairman ni bawk Malsawmtluanga chuan report a pe. Exhibition-ah hian kum 10-na pualin a duh apiang, Mizoram pawn lam thleng pawhin tel theih niin mi 48 an tel a, thlalak 146 theh luh a ni. Endiktu atan India leh ram pawn mi thiam bik sawm an ni. Exhibition chhung hian thlalakte hi man tlawm zawka lei theih a ni bawk.

Thlalak lut zinga a mawi zualte thlan chhuah niin, thlan chhuahte hian lawmman pawisa bakah trophy leh certificate a keng tel bawk. Lawmman pakhatna hi Hmangaiha Chhangte,Champhai hnenah niin pawisa Rs 10,000/- a dawng a, pahnihna Dr. C. Zoremsanga, Falkland Veng chuan Rs 7,000/ a dawng a, pathumna lawmman Rs 5,000/ chu Parvej Akhtar, Kolkata hnenah hlan a ni. Anni bakah hian mi panga thlan chhuahte chuan Rs 1,000, trophy leh certificate an dawng bawk a ni.